«Համլետ. Collapse»․ առաջնախաղ` Ռուսական թատրոնի բեմում
Կ. Ստանիսլավսկու անվան ռուսական դրամատիկական թատրոնում կայացավ «Համլետ. Collapse» ներկայացման առաջնախաղը՝ ըստ Ու. Շեքսպիրի «Համլետ» ողբերգության։ Բեմադրիչ՝ Սուրեն Շահվերդյան։
«Համլետ. Collapse»-ը ցնցող ժամանակակից ողբերգություն է՝ ստեղծված Ուիլյամ Շեքսպիրի «Համլետ» պիեսի մոտիվներով, որտեղ խելագարությունն այլևս ընտրություն չէ, այլ քայքայվող համակարգի ախտանիշ։ Ներկայացման աշխարհը թունավոր իրականությունն է, որտեղ իշխանությունը ճնշում է վախով, սերը՝ խեղում, իսկ ընտանիքը վերածվում է դավաճանների խմբի։ Այստեղ ճշմարտությունը զենք է, սուտը՝ վիրուս, իսկ մարդկությունը դանդաղորեն մեռնում է սեփական պատրանքների մեջ։ Համլետը փորձում է շնչել բռնության, մանիպուլյացիաների և տոտալ վերահսկողության աշխարհում, սակայն յուրաքանչյուր քայլ նրան ավելի է մոտեցնում կործանմանը։ Ներկայացումը պատռում է դիմակները՝ մերկացնելով ժամանակակից իրականության աղճատված «նորման», և ստիպում է հանդիսատեսին ընդունել․ ոչ միայն Համլետն է խելագար, այլև ամբողջ աշխարհը, որը մենք ինքներս ենք մեզ համար կառուցել։
Ներկայացման մեջ խաղում են Գոռ Համբարձումյանը, Էրվին Ամիրյանը, Նարինե Պետրոսյանը, Ելենա Վարդանյանը, ՀՀ վաստակավոր արտիստ Արման Ղազարյանը/Կարեն Հակոբյանը, Արեն Խաչատրյանը, Անտոն Աղաջանյանը, Սերգեյ Գրիգորյանը, Արման Մեժլումյանը, Վյաչեսլավ Շամիրյանը, Թեհմինե Խաչատրյանը, Գրիգոր Խոջայանը, Մելսիդա Հակոբյանը, Յուլյա Ֆինկը, Նառա Թումասյանը, Աննա Պուշկինաը, Անաիդա Գաբրիելյանը, Լալիտա Բուկիան, Արթուր Պետրոսյանը, Յանա Տուրգունյանը, Լև Նալբանդյանը, Ելենա Կասիմյանը, Աննա Խաչատրյանը, Աննա Մանուչարյանը։
Բեմականացումը՝ Սուրեն Շահվերդյանի, Նարա Ստեփանյանի, բեմանկարչությունը՝ Արգիշտի Փիլոյանի, զգեստները՝ Իզաբելլա Սոֆրոնովայի, խորեոգրաֆիան՝ Նունե Կիրակոսյանի, լուսային ձևավորումը՝ Հայկ Աղաբեկյանի։
Ներկայացումը նախատեսված է 18+ տարիքային հանդիսատեսի համար։